Жұбатқан Нұрлыбек Хайроллаұлы

Жұбатқан Нұрлыбек Хайроллаұлы−Т.Ахтанов атындағы Ақтөбе облыстық драма театрының директоры,  «Екі езу» сатира театрының негізін салушы, ҚР-ның Мәдениет қайраткері.

Жұбатқан Нұрлыбек 1968 жылы 17 қарашада Ақтөбе облысы Шалқар ауданы Жылтыр селосында өмірге келген.

1986 жылы орта мектепті бітіріп, 1990-1995 жылдары Әль - Фараби атындағы Шымкент педагогикалық мәдениет институтының «Мәдени, ағарту жұмыстарын ұйымдастыру» факультетінің театр бөлімін  оқып тәмәмдағаннан кейін, Ақтөбе қаласындағы облыстық филармония мен  бір мезгілде  Ақтөбе мәдени ағарту училищесінің театр бөлімінде 2 жыл дәріс беріп, еңбек жолын бастады.

1997-1999 жылдары облыстық «Ақтөбе» газетіне меншікті тілші болып қызмет жасайды. Газет қабырғасында қызмет атқарып жүріп, ол халық көкейіндегі өзекті де өткір мәселелер жөнінде және елдің мәдени-рухани өміріндегі болып жатқан оқиғаларды үнемі газет бетіне жариялап отырды.  Ол сонымен бірге газет ішінен көптеген айдарлар ашты, мысалыға «Күміс микрофон», «Қалжың қапшық», «Сиқырлы дүние», «Тұрмыс түйткілдері» және т.б.  Нұрлыбек өзінің жаңашыл әрі ізденімпаздығының арқасында, осы салада қызмет атқара жүріп «Екі Езу» күлкі клубын ұйымдастырды, сонымен  бірге «Екі Езу» әдеби - сын сықақ газетін шығарды. Жергілікті телеарналардан «Екі Езу» әзіл сықақ бағдарламаларын жасады. Оған дәлел Облыстық «Қазақстан - Ақтөбе» телеарнасында 2 жылға жуық уақыт «Екі Езу» әзіл - сықақ тележурналын түсіріп халыққа көрсетті. Театрдың  жетістіктері туралы  жазған оның   әңгімелері мен әзілдері облыстық  басылымдарда  және  Республикалық  «Жас  алаш»,  «Қазақстан  әйелдері»,  «Казахстанская  правда»,  газеттерінде  жарық  көрді. Нұрлыбек қозғаған көкейкесті мәселелер өткір әрі халықтың ойынан дөп шығып жатты. 

1996 жылдан бастап республикаға танымал «Тамаша», «Күлкі керуені», «Терісқақпай» театрларымен шығармашылық байланыс орнатты. Ол көптеген әзіл - сықақ интермедияларының авторы. «Тамаша» ойын - сауық отауында оның жазған «Операция», «Арықтау тәсілі», «Мисс-96», «Ажырасу», «Әжелер сайысы» және т.б. интермедиялары орындалып, Республикалық телеарналарда көрсетіліп жүр. Қазақ эстрадасының тарландары Қ.Сұлтанбай, Л.Каденова, марқұм Т.Құлыбеков Н.Жұбатқан жасаған күлкілі кейіпкерлерді сахналады.

2000 жылы жігерлі жұмыстарының нәтижесінде «Ақтөбе» газетінің 75 - жылдық мерейтойына орай оған қала әкімі арнайы алғыс хат табыс етті.

2000 жылдан облыстық деңгейдегі «Екі Езу» мәдениетті қолдаушы қоғамдық қорының төрағасы.

2001 жылы Нұрлыбек өзі ұйымдастырған күлкі клубы, үлкен театрға айналып Облыс әкімінің шешімімен  мемлекет қарамағына көшеді. Қазірдің өзінде «Екі Езу» эстрадалық миниатюра театры Қазақстан Республикасы мемлекеті қарамағындағы жалғыз әзіл - сықақ театры. Қазір Н.Жұбатқан «Екі Езу» эстрадалық миниатюра театрының басшысы, әрі авторы.

2002 жылы Алматы қаласында өткен І-Республикалық әзіл-сықақ конкурсында ІІ-ші жүлделі орынды жеңіп алды, және осы жылы Астана қаласында өткен Ү - Халықаралық  «Шабыт» шығармашыл жастар фестивалінде оның оның театры «ГРАН-ПРИ» (бас жүлде) жеңіп алды.   

2002 жылы Н.Жұбатқан облыс әкімінің шешімімен ұлттық мәдениетті дамытуға,  театр өнерін ерекше көтеруге қосқан үлесі үшін «Жыл адамы» атағын жеңіп алды.

2002 жылдан бері Нұрлыбектің бастамасымен жыл сайын  әзіл-сықақшы таланттарды іздеп, оларды жарыққа шығару мақсатында «Айтқыштар  Ақтөбеде»  атты  Облыстық  әзіл-сықақ  сайысы  өткізіліп тұрады. Осы сайыстың жеңімпаздары таланттарын шыңдау үшін талай республикалық деңгейдегі ірі сайыстың жеңімпаздары мен жүлдегерлері атанды. Міне осылардың жолын ашуға, өнер жолына келуге Нұрлыбектің сіңірген еңбегі мен жасаған жұмысы орасан зор.

2003 жылдан Республикалық «Ара» сатиралық журналының Ақтөбе облысы бойынша меншікті тілшісі болып тағайындалды.

2004 жылдан бастап, оның ықпалымен, ізденімпаз еңбегінің нәтижесінде  жергілікті әнші, ақын, сазгерлермен шығармашылық қатынас орнату мақсатында жылына екі рет дәстүрлі түрде «ЖЫЛ ӘУЕНІ» атты ән шеруі байқауы өткізіліп тұрады. Нұрлыбек Қазақстан Республикасы Мәдениет, Ақпарат және Қоғамдық келісім Министрлігінің «ауыл мәдениетінің дамуына айрықша қосқан еңбегі үшін» «Құрмет Грамотасымен» марапатталды. Автор ретінде өзі шығарған 100-ге жуық әндерімен, 100-ге жуық жазған интермедиялары бар. Әнді өзі орындайды. Сахнада өзі жазған күлкілі кейіпкерлерін сомдайды. Нұрлыбектің қажырлы еңбегінің арқасында театр үлкен сахна болып табылатын Алматы қаласындағы Республика Сарайында және Астана қаласындағы Конгресс – Холл сарайларында бірнеше рет жеке шығармашылық концертін қойды.

2004 жылдан бері Қазақстан Республикасы Журналистер Одағының мүшесі.

2006 жылы қазан айында Астана қаласындағы Конгресс-Холл сарайына да үлкен шығармашылық концерт қойды.

2006 жылы жарық көрген «Қазақстанда кімдер тұрады?» атты энциклопедиялық жинақта Нұрлыбектің шығармашылық өмірбаяны мен сіңірген еңбегі туралы жазылды.

2008 жылы ол өзінің  «Ауылдағы Айтқыштар» атты жинағын жарыққа шығарды. Ол жинаққа интермедиялар мен монологтар, әзілдер мен өлеңдер жиынтығы енгізілген.

2010 жылдан бастап Нұрлыбектің бастамасымен театр сатиралық теле журналдарды түсіруді қолға алып, оны түсіріп, монтаждап телеарналар арқылы халыққа кең көлемде көрсетіп келеді.

     2010 жылдан бері Қазақстан Театр Қайраткерлері одағының мүшесі.

ҚР Тәуелсіздігінің 20-жылдығы қарсаңында ұлттық мәдениет пен театр өнерінің дамуына қосқан үлесі үшін «ҚР Мәдениет қайраткері» атағын алды.

     Нұрлыбек Жұбатқанның бастауымен «Екі Езу» әзіл-сықақ театры 2012 жылы Алматы қаласында «Хабар» арнасының ұйымдастыруымен өткен      «ДУ ДУМАН»  әзіл-сықақ театрларының сайысы арасында «Үздік музыкалық нөмір» және «Көрермен көзайымы»  номинациясына ие болды.

2013 жылы «Қазақстан» ұлттық телеарнасының ұйымдастыруымен өткен «Жұлдызды сәт» тележобасында жоғары деңгейде өнер көрсетіп, II орын алды.

       2013 жылдың 23-29 қыркүйек күндері аралығында халық жазушысы Т. Ахтановтың 90 жылдығына орай өткен XXI-ші Республикалық Қазақстан драма театрлары фестивалінің ашылу және жабылу салтанатына, ішкі дайындық жұмыстарына зор үлесін қосты.

Ақтөбе облыстық «Екі Езу» эстрадалық миниатюра театрының құрылғанына 15 жыл толу мерекесіне орай 2013 жылдың 27-ші қараша күні Студенттер сарайында «Екі Езуге – 15 жыл» атты жап-жаңа концерттік бағдарламасын Ақтөбенің өнер сүйер көрермендеріне ұсынды.

       2013 жылдың сәуірінен бастап  Т. Ахтанов атындағы облыстық драма театрының директоры қызметіне тағайындалды.